Sugilanon nga Katingad-an: Ang kahoy nga Kumpang

Sa gamay pa ko, naay usa ka sugilanon ang akong apohan nga sa kadaghan sa iyang mga apo, ako ra iyang gisultian.

Sumala pa sa akong apohan nga ang kaning lugar sa airport karon, usa ka dako nga kalasangan. Sa gagmay pa sila sa iyang mga igsuon, kuyogon sila sa ilang amahan nga manglagbas gikan sa Ibo kung diin sila nagpuyo, padulong sa Basak. Kay lagi wala pay sakyanan, ila kining lakwon.

Matud pa niya, sa tunga-tunga sa lasang, naay isa ka higanti nga kahoy nga kumpang. Bisan pa daw ug naa ka sa Sugbo, imuha gihapon nga makita ang mao nga kahoy. Ingon sa ilang mga katigulangan, taw-an daw ang maong puno-an.

Ug sa diha nga nagsugod na ug pamotol sa mga kahoy kay himu-on na nga airport, ang mga bulldozer nga gigamit sa pagpamutol daw dili makatay-og sa puno-an sa kumpang. Kada bangga sa bulldozer, matingala sila kay naa silay madungog nga daw mga plato nga nangabuak. Pila daw ka adlaw nga ginahimu nila ang pag-bulldoze sa maong kahoy, peru wala gihapon sila nakaputol. Adunay mga driver nga nangahadlok ug ni surrender kay basin daw gabaan sila sa mga namuyo sa mao nga kahoy.

Human sa pipila ka mga adlaw, adunay isa ka tigulang nga nag-ihaw ug usa ka manok atubangan sa kumpang. Ug niingon ang maong tigulang nga palabyon usa ang 3 ka mga adlaw ayha nila balikan. Ug tuod man, human sa 3 ka adlaw gi-bulldoze nila pagbalik ang maong kahoy. Ug kadtong adlawa, ka-isa ra nila gibangga-an ang kahoy ug sayon lamang kini nga natumba.

Image: ctto